കൊച്ചി: നടുറോഡില്‍ യുവതിയെ കടന്നുപിടിച്ച കേസില്‍ മുന്‍ സര്‍ക്കാര്‍ അഭിഭാഷകന് ഒരുവര്‍ഷം തടവ് ശിക്ഷ. അഡ്വ. ധനേഷ് മാത്യു മാഞ്ഞൂരാനെയാണ് വിചാരണാക്കോടതി ശിക്ഷിച്ചത്. എണറാകുളം ഒന്നാംക്ലാസ് ജുഡീഷ്യല്‍ മജിസ്‌ട്രേറ്റ് കോടതിയുടേതാണ് വിധി. പ്രതി പതിനായിരം രൂപ പിഴ അടയ്ക്കണമെന്നും മജിസ്‌ട്രേറ്റ് കോടതി വിധിച്ചു. 2016 ജൂലൈ 14-ന് വൈകീട്ട് ഏഴിനായിരുന്നു കേസിനാസ്പദമായ സംഭവം നടന്നത്.
ജൂലൈ 14-ന് വൈകുന്നേരം ഏഴുമണിയോടെ എറണാകുളം കോണ്‍വെന്റ് ജംഗ്ഷനിലായിരുന്നു സംഭവമുണ്ടായത്. സ്വകാര്യ സ്ഥാപനത്തില്‍ നിന്ന് ജോലി കഴിഞ്ഞ് മടങ്ങവെയാണ് യുവതിയെ പ്രതി ധനേഷ് മാഞ്ഞൂരാന്‍ കടന്നുപിടിച്ചത്. യുവതി ബഹളംവെച്ചതോടെ സമീപത്തെ സ്ഥാപനത്തിലേക്ക് കയറിയ ധനേഷിനെ നാട്ടുകാര്‍ പിടികൂടി പൊലീസില്‍ ഏല്‍പ്പിക്കുകയായിരുന്നു. യുവതിയുടെ പരാതിയുടെ അടിസ്ഥാനത്തിലാണ് പൊലീസ് കേസ് രജിസ്റ്റര്‍ ചെയ്തത്.
ഈ കേസ് റിപ്പോര്‍ട്ട് ചെയ്തതുമായി ബന്ധപ്പെട്ട് സംസ്ഥാനത്തിന്റെ വിവിധ ഭാഗങ്ങളിലെ കോടതികളില്‍ മാധ്യമപ്രവര്‍ത്തകരെ അഭിഭാഷകര്‍ തടയുകയും ആക്രമിക്കുകയും ചെയ്തിരുന്നു. ധനേഷ് യുവതിയെ കടന്നുപിടിച്ചതായി സാക്ഷിമൊഴികളില്‍ നിന്ന് വ്യക്തമായതായി പൊലീസ് കോടതിയില്‍ സമര്‍പ്പിച്ച അന്തിമ റിപ്പോര്‍ട്ടില്‍ പറയുന്നുണ്ട്.
Content Highlights: Advocate Dhanesh Mathew Manjooran jailed for one year for assaulting woman in middle of road